كيفاش تكسب كليونات جدد و تستحفظ على القدم ؟

1- وقت إلي يجيك الكليون منرفز ! :

في الحالة هاذي ما عمرك ما تقولو نقص من حسك راك في شركة محترمة ، و إلا تقولو برا إشكي و أعمل إلي تحب !

الكلام هذا لكل أنساه ، و أفضل طريقة للسيطرة على الوضع هي أنك تقولو بكل حزم : أوكي أنا معاك و في بلاصتك نعمل أكثر من هكا و مستعد نحلك المشكل هذا توا !

إمشي مع الموجة و ما تعاندش !

2- كيف تلقى كليون يحب على Promotion و حاجة بوبلاش !

في خدمتك أكيد برشا أنو يجوك ناس يحبو على الفرص و على أسوام أقل من اللازم .

آش تعمل في الحالة هاذي : ما تقعدش تفسر و تبرر في موقفك، إحكيلو على زوز إلا ثلاثة فوائد في المنتج متعك و ما ينجمش يلقاهم عند المنافسين و خليه يمشي يقارن وحدو .

كانك حضرت قبل في دورة #Marketing_101 و الا في برنامج Social media marketing توا تتذكر أنو حكينا على phase de comparaison الموجودة في ال Tunnel de vente ، في المرحلة هاذي ال prospect من حقو أنو يقارن و يدرس الخيارات الموجودة في السوق ، وحكينا كيفاش تنجم تضمن أنو يرجعلك في 90℅ من الحالات.

معناها ما تطولش معاه في الحديث، كلمتين وقص و توا يرجعلك وحدو.

3 - الكليون إلي فاهم كل شيئ و يحكي بلغة Expert :

ما تناقشش معاه و تحاول تفرض رايك و أفكارك، أسمعو و خلي روحك في وضع التلميذ إلي قاعد يتعلم.

ثما نوعية من الناس تحب تظهر أنهم Des patrons و يحبو الناس تهابهم و تحترمهم و تسمع كلامهم، كيف كيف، إحسب روحك خدام عندهم و توا تشوف كيفاش تولي مهم عندهم وقت إلي ترضي النرجسية متعهم ! .

4- الكليون المتردد و إلي ماهوش فاهم ٱش يشري Prospect indécis :

ثما نوعية من الناس عندهم مشكل كبير في أخذ القرار، حتى في أبسط أمور حياتهم.

كيفاش تعرفهم الناس هاذم؟ : كيف يدخل المحل يقولك مانيش فاهم ٱش نشري ... ال comportement indécis يلزمو un choix unique.

معناها ما تهبطلوش الحانوت الكل و تقولو إختار !

أسمعو ٱش يحب، و من بعد أعطيه حل واحد و قولو إلي هذاكا هو الحل إلي يناسبو.

يلزمك تكون conseiller قبل ما تكون vendeur.

5- كان جاك كليون يحب فعلا يشري من عندك :

ما تتسرعش و تظهر الفرحة متعك، خليك عادي، و ما تدخلش من الأول و تظهر أنك تحب تبيعلو، خليه يسألك و من بعد أعطيه الحاجات الموجودة.

الكليون الي يحب يشري وقت إلي تعملو Forcing في البيوع راهو يهرب !

6- الكليون الي يحب يتفرج و يمشي :

ما تتنرفزش، وما تظهرش روحك فادد منو و أنو جاي يضيعلك في وقتك، أقبلو و أفرح بيه كأي كليون مستعد يشري من عندك.

أعمل Des cartes de réduction و قولو كان يرجعلك عند تخفيض و الا cadeau !

7- الكليون إلي يشري ليوم من عندك بأسوام رخيصة، غدوة ينجم يشري من عندك بأسوام أغلى.

معناها ما تخزرش للمربوح متع اليوم، ركز على ال Time life Value TLV - معناها القيمة الي تربحها من أي كليون طول ماهو قاعد يتعامل معاك.

في تقسيم الكليونات ثما 3 أنواع :

- الكليون إلي يشري مرة برك و يمشي على روحو Les passagers.

- الكليون الي ديما يشري من عندك و ما ينصحش غيرو.

- الكليون الي ديما يشري من عندك و زيد ينصح غيرو أنهم يتعملو معاك Client promoteur.

مهمتك هي أنك تقدم إمتيازات و خدمات VIP للنوع الثالث على خاطرهم قاعدين يحسنو في المصداقية متعك و يعملو في Publicité ليك.

8- يلزمك تقسم كليونات ل des catégories (في التسويق هذا يتسمى segmentation ) .

كيفاش تتم الأمور :

يلزم قبل كل شيئ يكون عندك برنامج لإدارة العلاقة مع الحرفاء CRM.

من بعد أعمل تقسيم للكليونات بالطريقة هاذي :

- الكليونات إلي يحبو خدمات و الا منتوجات personnalisé و ساعات ما تتوفرش عندك.

- الكليونات إلي يهمهم البهرج و luxe و الأسوام الغالية.

- الكليونات إلي sensible للأسوام و إلي قاعدين يصطادو في les promotions.

- الكليونات الي قاعدين يجيبولك في كليونات جدد .

- الكليونات الي ديما يشرو حاجة معينة ..

9- ما عمرك ما تجري ورا الكليونات الي يحبو البروموسيون !

إعلمو بالتخفيض وقتاش يبدا و وقتاش يوفا.

من بعد أعمل rappel 1

و أعمل rappel2

و أعمل rappel 3 نهار الي تكمل ال promo

الكليون الي يتشرط و يقولك زيد اعملي سوم، و الا تحاول تقنعو و الا يقولك خليلي نفس سوم البروموسيون للجمعة الجاية راهو هذاكا في 90℅ من الحالات ماهوش باش يشري من عندك (تجربتي الشخصية ) .

10 - الكليون التونسي وقت إلي تعجبو حاجة معادش يبدلها !

وقت الي تعجبو قهوة يولي ديما يمشيلها

وقت الي يعجبو مقاول يولي ديما يتعامل معاه

وقت الي يشري brand متع تاليفونات و تعجبو يولي ديما يشري منها.

الكليونات الي ترتبط عاطفيا ببلاصة معينة و الا بشخص و الا بعلامة تجارية معينة يتسمو Clients émotionnelles.

يلزمك تستغل الميزة هاذي لتحسين خدماتك و لتحسين retention و تخلي الي شرا من عندك مرة يولي ديما يشري من عندك.

11- ما عمرك ما تخلي الخدامة في علاقة مباشرة مع الكليونات من غير مراقبة و contrôle و تقييم !

يلزمك :

- تخلي الكليونات تعطي رايها و تعمل تقييم لمستوى الخدمة.

- تعين des clients mystères , معناها تبعث ناس في هيئة كليونات و تخليهم يحضرولك تقرير لمستوى الإستقبال و التصرف متع فريق المبيعات و الا الإستقبال.

نفس الشيئ ينطبق على الناس الي تجاوب على المكالمات , الميساجات و الإيميلات .

- كيف تكثر الخدمة يلزمك تعمل charte تنظم فيها تصرفات الخدامة مع الكليونات و اللبسة و حتى طريقة الكلام ! .

و ديما تذكرهم بيها.

إكتشف عرض تسويق المنتجات