كيفاش تعمل علامة تجارية إبتداء من الصفر ؟

قبل ما تعمل أي علامة تجارية ، سواء علامة تجارية شخصية Personal Branding و الا علامة تجارية ثما جملة من الشروط و الي كيف تلتزم بيها كون متأكد انك توصل تبني سمعة تجارية و بالطريقة الصحيحة .

نبدو بأول حاجة :

1- يلزمك تعرف رأي الناس فيك و في منتجاتك : طول ماك تخدم و تبيع ديما أعمل إستقصاء للرأي من خلال مجموعة من الأسئلة في شكل Sondage ، و هذا يتم بالتاليفون ، عبر قروب أو بالإيميل .

القيام ب enquête لمعرفة رأي الناس ينجم يخليك تحسن برشا حاجات كيف تطوير منتجات جديدة أو حتى تحسين الأسعار .

2- أعمل Communauté عندها اهتمام بفكرة معينة أو حتى بالعلامة التجارية متاعك :

مثلا الي يبيعو في اكسوارات المطبخ ينجمو يعملو communauté تعطي وصفات بالفيديو و في نفس الوقت تنجم تعمل اعلان لمنتجاتها بطريقة غير مباشرة ، و بالطريقة هاذي تولي تعمل communauté تتأثر بيك و بأفكارك .

كون متواجد على الشبكات الإجتماعية ، و كون قائمة بريدية و نوع من طرق التواصل .

3- إخدم على تقديم أفضل قيمة ممكنة :

ما يكفيش أنك تبيع منتج أو خدمة عادية ، يلزمك تكون مميز و غير عادي ، و حتى توصل تحدد أفضل قيمة تنجم تقدمها لكليوناتك ، أسأل روحك هل أنو :

- منتجاتك و خدماتك فيها حاجة تميزك على المنافسين ؟

- هل انو القيمة الي تقدم فيها تفوت المبلغ الي باش يدفعو الكليون ؟ - معنتها هل انو العرض متعك يعتبر صفقة ما تتفلتش ؟؟ كان لا عاود أدرس مكونات العرض متعك .

- هل انو العرض متعك مرتبط بمشاعر معينة ؟ و هل انو الناس تتفاخر كيف تشري المنتجات متاعك ؟

4- كون مرتبط بالأقوياء ! :

مثلا كيف تبيع لشخص مشهور او شركة معروفة ، هذا يعتبر إضافة لرصيدك التجاري .

و زادا كيف تعمل شراكة مع مؤسسات معروفة عندهم منتجات تكميلية ، هذا يعتبر انجاز .

و كيف واحد من المؤثرين المعروفين يحكي عليك هذا يرفع من وزنك في السوق .

5- إخدم على المحتوى ثم المحتوى ! :

و هاذي أهم حاجة نأكد عليها ، راهي الناس تحب حاجة تثبت أنك ولد الدومان !

و هذا ما يتمش بالإقناع و الحديث التجاري .

كانك تبيع في الدبش احكي على الموضة

كانك تخدم في الديكور قدم نصائح في الديكور .

كانك تبيع في منتجات غذائية صحية ، اعمل محتوى يعاون الكليون انو يختار منتجات تحافضلو على صحتو .

كانك عندك راستورون كل يوم اعمل فيديو لتحضير وصفة معينة.

و خمم ديما في العلامة التجارية قبل البيوع !

6- إختيار الهوية البصرية Identité visuelle :

في باج التسويق بالتونسي الي يميزنا هو الشاشية و اللون الأخضر ، وهاذي تتسمى هوية بصرية معنتها من اول ما تشوف الlogo في الفيسبوك مباشرة تعرف انو مقال تابع التسويق بالتونسي .

و لهذا كان تحب تصمم logo و تكون عندك charte graphique من الأفضل انك تلتزم بالقواعد هاذي :

- يكون الشعار مميز ، و ساهل حفضو و تمييزو على بقية المنافسين او اي شعار ٱخر .

- ما تخدمش شعار خدموه قبل عبر Générateur des logos - من الأفضل انك تخدم حاجة خاصة بيك .

- اللوقو المعقد الي ما يتحفضش راهو زايد و خسارة فلوس - كان لاحظتو شعار اليوتيوب حتى ولد صغير عمرو 3 سنين يميزو طول و يقولك هذا يوتيوب .

- ال Charte graphique الوانها الرئيسية كيف الوان اللوقو .

- ثما ما يسمى ب psychologie des couleurs , حاول تخدم بالمبدأ هذا في charte متاعك .

- تنجم تستعمل Mascotte كانك تبيع في خدمات و منتجات بإسمك الشخصي .

7- كان عندك اسم ل communauté او لعلامة تجارية حاول انك تكون في المقدمة و تظهر للجمهور :

مثلا Tesla و Space X ديما تلقو Elon Musk يحكي عليهم و يسوق في روحو على اساس انو هو صاحب جميع الافكار و كل شيئ تحت قيادتو ، في حين هو يعتبر مجرد واجهة اعلامية و تسويقية و الخدمة الصحيحة عند المديرين و فريق العمل .

في التسويق بالتونسي ثما Elyes Chelby - لكن نعتبر روحي مقصر نوعا ما في الجزئية هاذي و مبجل اسم التسويق بالتونسي على إسمي الشخصي .

و لهذا كان عندك علامة تجارية حاول تظهر و الا تشوف شكون يظهر في عوضك و يكون الناطق الرسمي للبراند متاعك .

8- كون متميز في سياستك التسويقية :

وقت إلي تكون حملاتك التسويقية مختلفة على للبقية اكيد جدا انو الناس باش تتذكرك !

ثما شكون متميز في تقديم المحتوى المجاني .

ثما شكون عندو حملات اعلانية متميزة سواء على google او الفيسبوك .

و ثما شكون يخدم على الparrainage و الAffiliation ...

المهم اسمو وين تمشي تلقاه ! و هذا بالطبيعة يتطلب $$$$ .

9- ما تخليش منتجاتك موجهة للناس الكل !

ثما شكون يلقى روحو مع الشركات الكبيرة ، و ثما شكون يحب يخدم مع المستهلكين العاديين ، و ثما شكون يحب منتجاتو و خدماتو موجهة للمهنيين الصغار .

و حتى في السياسة التسويقية ركز على لغة واحدة (الا في حالة المنتجات و الخدمات الluxe ) باش تتلز تخدم بالفرنسية و الأفضل قبل ما تاخو القرار هذا اعمل مجموعة تجارب و sondages .

أدرس حجم السوق و النقائص الموجودة و امكانية التطوير و اختار فقط Segment du marché .

سجل في دورة تسويق المنتجات لتطوير البراند متاعك