بسيكولوجية الجماهير في التسويق

قبل ما نبدو نفسرو في موضوع الmanipulation sur les réseaux sociaux ، حبيت نقسم الموضوع لعدة مقالات باش تبدا الأمور مفهومة و بعيدة على الغموض و التعقيد.

تنبيه بسيط قبل ما نبدو : المقال هذا من وحي الخيال و لا يمت للواقع بصلة و أي تشابه في الوقائع الحالية فهو من محض الصدفة

و كبداية ، يلزمك تعرف إلي المقال هذا طويل شوية، على خاطر و قبل ما نبدو في لب الموضوع يلزمك تعرف أساسيات الmanipulation de masse ، أو ما يسمى بطرق السيطرة و توجيه القطيع، و أحسن مثال هو أنو نعتمدو على التحليل إلي إعتمدو الكاتب الأمريكي Noam Chomski و إلي ذكرهم في كتابو Manufacturing Consent و الي صدر عام 1992.

الكاتب ذكر 10 طرق تمكن أي شخص عندو ميول قيادية من أنو يوصل يسيطر على الناس و يتحكم في أفكارهم و قناعاتهم و إلي هما :

1- كثرة الأخبار المبنية على التفاهة و البروبقندا و الbuzz : يعني كل مرة يلزم يظهر خبر جديد سواءا كان تافه او يمس الحياة اليومية للناس، معناها يلزم ديما ثما سلسلة منظمة من الاخبار و وين توفا حكاية يلزم تظهر حاجة أخرى و تتخدملها حوارات و لقاءات.. و هذا لكل يتسمى Distraction médiatique.

و باش تنجح الأمور يلزمك تعمل implication للناس و تخليهم يتفاعلو مع الخبر على الفيسبوك و غيرو .. و هكا تكون ساهمت انك تخلي الذاكرة متعهم قصيرة و ما يتذكروش الاهداف و الحاجات المهمة، و حتى كان تكذب كذبة راهم ماهمش باش يتذكروها..

2- يلزمك تعتمد سياسة خلق المشكل و إيجاد الحل : مثلا تقعد مدة ما تراقبش الاسعار و من بعد تطلعلهم بفكرة حملة مقاطعة البياعة الي اسوامهم غالية و في الأخير توجههم لصاحبك الي عندو grand surface و تعلمهم الي هو قاعد يبيع في البانان بدينار و من الاحسن يشرو من عندو ..

3- تعتمد سياسة التدرج في المراحل : مثلا وقت تحب تزيد في سن التقاعد من 60 لل75 عام يلزمك كل عام، تخرج للخدامة متعك و تقوللهم إلي نظرا الأوضاع الصعيبة الي تمر بيها الشريكة راهو تم الترفيع في سن التقاعد ب 3 سنين اكاهو و كل مرة زيدهم عامين و الا ثلاثة في retraite لين يلقو رواحهم يخرجو تقاعد في 80..

4- إستعمل الأهداف المؤجلة : مثلا.. وقت الي تحب تنقص نسبة معينة من شهرية الناس الي يخدمو عندك، قوللهم، الي المؤسسة هي متاعهم و هما شركاء، و اي حاجة تمسها راهي تمسهم، و بالتالي راهو باش يتم إبتداءا من العام الجديد، إقتطاع 3٪ من كل شهرية بعنوان مساهمة لإنقاذ الشركة... و لنا ماكش باش تلقى معارضة على خاطر الناس باش تقولك يا من عاش حتى نعيشو للعام الجاي..

5- تحكي مع الجمهور كينك تحكي مع الصغار : معناها يلزمك تطبق نفس اللهجة و لغة الجسد كيف أنك باش تعطي أوامر لصغير عمرو 5 سنين..

و هذا لكل علاش؟ على خاطر في علم التواصل البشري وقت الي تخاطب شخص بطريقة عاطفية و تحسبو ولد صغير، الاجابة متعو باش تكون مماثلة و ما فيها حتى إدراك منطقي!

مزلت تشوف الأمور صعيبة؟ برا تفرج في الاعلانات الي في التلفزة توا تفهم الموضوع..

6- يلزمك تحكي بالعاطفة messages émotionnelles ، كيف أنك تستعمل كلمات تمس مشاعر الناس كأحنا عايلة وحدة، و هاذي شركة العايلة، و أحنا خوات و بكلنا يد وحدة..و كان لزم ظهر انك قريب تبكي و حتى كان تبكي ميسالش هكا يزيدو يتأثرو بيك.. تصرف وحدك منغير ما نفسرلك..

7- تستعمل التشجيع الزائف : كان جمهورك مزال جاهل و فوضوي و يطيش كل شيئ في الشارع و زيد ما يعرفش يشد الصف و زيد عندو جرعة من العنصرية، رد بالك ثم رد بالك تذكرهم بأوصافهم !!! يلزمك تقوللهم أنتم جمهور رمز للتحضر و النظافة و التسامح و الثقافة ! فهمتني؟ يلزمك تطبق مقولة

Il faut toujours caresser au sens des poiles !

8- يلزمك تحسس كل شخص انو مسؤول على مصيرو و مصير المؤسسة Le sentiment de culpabilité: معناها كان انت مثلا ما عندكش المعدات و الخدامة تنظف الشريكة و الي يخدمو عندك فادين من الوسخ و الفوضى ، يلزمك تلوم جميع الي يخدمو عندك و تقوللهم الي هما مقصرين في نظافة المؤسسة و لهذا يلزم نخصصو نهار لتنظيف المؤسسة الي هي ملكهم.. معناها تعطيهم احساس انهم هما السبب، باش تتفادى انهم يثورو عليك و يخسروك في فلوس التنظيف..

و تنجم زادا تقنعهم أنهم يتخلو على نهار من شهاريهم

و في صورة أنو ثما شكون معارض للفكرة متعك تنجم تظهرو قدام زملائو انو مندس من المنافسين و ما يحبش الخير للخدامة.

فاهم توا؟

10 - يلزمك تعرف جمهورك لأقصى درجة ممكنة، تنجم تعين خبراء في علم النفس، و الا في علم الإجتماع، تنجمع تستعمل التقنيات الجديدة المعتمدة على آل intelligence artificielle و تراقب تحركاتهم بles données biometriques ، و هكا تنجم تحضرلهم خطابات و عروض و بهرج غير عادي