الCopywriting بالتونسي

مقال اليوم يخص الCopywriting .. و الي تعتبر معرفتو مهمة قبل ما تخمم انك تعمل تسويق لأي منتج..

خلينا نفهمو الموضوع..

قبل ما تشري أي منتج لازم ثما حاجات تخليك تتشجع و تمم عملية الشراء و الا ثما زادا حاجات تخوفك و تخليك تتراجع.

و لهذا باش تنجح عملية الشراء يلزم يكون البائع متمكن من زوز حاجات و الي هما :

- أنو يركزلك على منافع المنتج Les bénéfices.

- يقلل من الحاجات الي تخوفك Les objections

و الزوز حاجات هاذم هما أساس الCopywriting و الي نلقوهم في :

- اعلانات الفيسبوك..

- صفحات البيع Pages de vente

- فيديوهات البيع

- الاعلانات الاذاعية..

كيفاش تكون Copywriter مقنع !..

ثما 4 طرق رئيسية تمكنك من أنك توصل الMessage متعك و توصل تقنع الحريف المحتمل بفكرتك و إلي هما :

1- أنك تركز في خطاباتك التسويقية على المنافع Les bénéfices : كيف أنك في عوض تقول للكليون : أحنا نعملو Sponsoring، تولي تقولو : أحنا قادرين أنو نوصلولك اعلانك على الفيسبوك لأكثر عدد ممكن من الناس الي عندهم استعداد انهم يشرو من عندك !

2- تخدم برشا على الStorytelling : و الي يتمثل في "السرد القصصي" ، من الآخر، ركز على انك تحكي قصتك الي وصلاتك انك تستعمل المنتج و الا جيب كليون يحكي على قصتو مع خدماتك و منتجاتك و خلي حديثو Spontané ..

الStorytelling كيف ماهو مهم في مجال التسويق، مهم زادا في السياسة و على هذاكا les Spins doctors يركزو على التقنية هاذي و يخلو المجال للLes influenceurs من الوجوه المألوفة كيف الممثلين و غيرو.. و الا الناس الي عاونوهم و الا اشتركو معاهم أنهم يحكو قصصهم و تجاربهم و ديما هذا لكل في اطار الmanipulation de masse و الbusiness charity..

3- تجاوب على مخاوف الحرفاء Les objections : بلغة أوضح ، حاول أنك توصل تعرف جميع مخاوف الكليونات الي تمنعهم انهم يتعاملو معاك و تعطيهم حلول كيف أنك تعطي ضمانات من نوع Remboursement intégral، garantie 30 jours satisfait ou remboursé..

4- عناوين البيع يلزمها تكون واضحة و مفهومة و تحل مشكل معين : مثال : في عوض أنك تحكي بلغة خشبية غامضة و تقول : التوانسة لكل يتعاملو معانا

تولي تقول : إنظم إلى قائمة ال500 الف تونسي الي وثقو فينا في 2019.

و زادا ، في عوض أنك تقول : شركتنا باش توفر مواطن شغل للجميع..

تولي تقول : عندنا إستراتجية فعالة لتوفير 764 موطن شغل جديد موزعة على 4 و لايات قبل نهاية 2020 !

المهم إستعمل الأرقام و كون واضح و صريح...