8 أفكار لبيزنس المقاهي و المطاعم .

خلينا من البيع المشروط و الخدمات الغالية بلا نظافة و بلا مطعم ، و خلينا من الكليونات الي تحب الرداءة بجميع أشكالها .

المقال هذا موجه للمستثمرين الشبان إلي يحبو يستثمرو في مجال الأكل و القهاوي و بطريقة جديدة و تكون موجهة للناس الذواقة إلي مستعدة تدفع أكثر مقابل أحسن الخدمات .

و الإستثمار هذا يكون بثلاثة طرق :

- الإستثمار في تطبيق يجمع ما بين الكليونات و أصحاب المطاعم إلي تعمل ال Delivery

.- الإستثمار في مقهى أو مطعم لكن بطريقة جديدة و مختلفة .

- تعمل Cloud kitchen وتخدم كان توصيل بلا كراسي و لا طواول .

ثما 8 طرق تخلي خدماتك توصل لأكثر عدد ممكن من الكليونات و تخليهم ديما يتعاملو معاك .

أولا : يلزمك تخدم على ثقافة الإنتماء : معنتها تعمل فضاء في شكل Club و توفر للكليونات إلي تجي ديما carte membre و وين يشرو حاجة يربحو نقاط ، هاذي يلزمها سيستام ، و يلزمها زادا تعامل أكثر من إنساني بطريقة تحسس الكليون أنو في دارو و أنو قادر يتعرف على ناس جدد .

ثانيا : تكون متواجد على Google maps : و يكفي أنك تكتب Google my business في محرك البحث و تبع الإجراءات ، و بالطريقة هاذي يولي موقع متعك معروف على خرائط قوقل و أي شخص ينجم يشوف تصاور المحل و ٱراء الحرفاء .

ثالثا : تعمل brand متميزة و خاصة بيك ، المهم تكون حاجة original في اللوقو و الألوان و طريقة الخدمة و الإعلانات .

و على ذكر الإعلانات : ما عادش تستهدف الناس الي تبعد عليك عشرين كيلومتر ، كليوناتك المهمين متواجدين في rayon de 5km .

رابعا : يكون عندك تواجد على أهم الشبكات الإجتماعية سواءا بالمقالات ، التصاور ، الفيديوهات ، و إخدم على Hashtags.

خامسا : لكل منتج أعمل أسعار متقاربة و السعر يزيد حسب حجم الgoblet , من الأفضل تحط 3 أسعار و ٱخر زوز أسعار خليهم قراب ، مثلا حجم صغير 1.700 ، حجم متوسط 2500 ، حجم كبير 2900 و الإستراتيجية هاذي تتسمى Decoy pricing

سادسا : إستغل " النهم Gourmandise" : الناس تحب الحاجات إلي تشهي و هذا هو سر نجاح قنوات الطبخ و الstreet food ، و لهذا إخدم فيديوهات التحضير بطريقة احترافية و قول الي الوصفة هاذي متوفرة في الpetit dej. بسعر مميز .

سابعا : خلي الناس تعملك التسويق سواءا بالparrainage او حتى بالبارتاج متع منشوراتك .

ثامنا : كون متميز و إبعد على الأفكار المستهلكة : إخدم وصفات جديدة ، وفر أنواع جديدة متاع قهوة ، و ركز مليح مع الخدامة و علمهم كيفاش يقدمو الخدمة ، و خلي الهدف متعك صناعة processus خاص بيك و من بعد يمكن تولي تبيع الإسم في شكل Franchise !