7 أسباب تخلي أي مشروع ما ينجحش

سواء كنت تخدم أونلاين أو حتى عندك بيزنس تقليدي هاذم أهم 7 أسباب تخلي أي مشروع ما ينجحش :.

أولا : برشا مصروف على أمل إيجاد مبيعات ، كيف نفقات الموارد البشرية ، الكراء ، دفعات القروض ، إستثمار في حاجات من الممكن تأجيلها ...

كانك جديد خلي نفقاتك ما تفوتش 20% من المبيعات و الا راك تلقى روحك hors jeux !

ثانيا : مولا المشروع ماهوش حارص على رزقو ، يعني نحكو على شخص ما يعرفش الخدامة فاش يخدمو ، و لا ٱش ثما في الكاسة و الا يكون غايب جملة .

عندك خدامة و تحب الخدمة تمشي ؟ شد رزقك من الصباح لليل لين المشروع يولي يمشي و زيد تحسسهم أنهم مراقبين و ما يفوتك شيئ.

و تذكر : كثرة الثيقة و الإهمال تخلق فرص للنوم و الا للسرقة !

ثالثا : ما عندكش سيستام للمراقبة : نحكي على processus لمراقبة المداخيل و النفقات و أي واحد ينجم يهز من الكاسة و يصرف سواء شريك أو مولا المول من غير traçabilité ، مراقبة مكان العمل و الموارد البشرية ، و ما ثماش سيستام لمتابعة الطلبات و الي فيه كامل قائمة الي تعاملو معاك و الا الي إتصلو بيك ، و ما تقوليش نخدم بالexcel راهو ماهوش متع خدمة .

رابعا : انعدام الخبرة و خاصة المعرفة في التسويق و المحاسبة و ادارة الموارد البشرية ، و راهو كيف تولي تفهم في التسويق و تحسن في المبيعات و تزيد عندك اامداخيل راك باش تلقى مشكل في المحاسبة و ال rapport de trésorerie و ما تستناش من الكونتابلي متعك انو ينبهك لهذا لكل .

خامسا : قاعد تبيع و المرابيح ضعيفة و ما تغطيش النفقات ، مثلا تقولي راني نخرج في 1000 كولي في الشهر لكن ما توصلش تخلص المصاريف ، هنا عندك مشكلة في هامش الربح يعني تبيع منتج ب 30 دينار و تربح كان 3 دينارات و هنا يلزمك تراجع روحك .

سادسا : ما ثماش بهرج للمنتج أو الخدمة : أحببنا او كرهنا في قطاع الخدمات بهرج المحل و لبسة الشخص الي يقابل الكليون هو الي يحدد شكون باش يتعامل معاك و قداش يدفعلك ، و في مجال بيع المنتجات ال emballage هو الي يحدد مصير المنتج سواء النجاح أو الفشل و ما تقوليش عندي منتج باهي و original !

سابعا : ما تحبش تصرف على الكورسات و الإستشارات و تحب كل شيء بلوشي من اليوتيوب و القروبات .

الأفكار القوية سواء استشارات في التسويق ، إستشارات قانونية ، استشارات في المحاسبة كلها تتباع بالفلوس و ما تستنى حد يعطيك حاجة مجانية و تفيدك في خدمتك .