10 أخطاء يلزمك تتفاداهم وقت الي تبيع

أولا : ما تعطيش برشا عروض : خاصة مع الكليون المتردد و الا الي عندو صعوبة في اتخاذ القرار - يتسمى زادا Client indécis - و الي يقولك مانيش عارف ٱش ناخذ، يلزمك انت تقرر في بلاصتو و تقترح عليه افضل حل و الي يتماشى مع الميزانية متاعو، بخلاف هذا أنسى هو في أبسط قرارات حياتو متردد.

ثانيا : معادش تقول للكليون فكر و كلمنا - بالتجربة : الي نقولو فكر و ارجعلي في 99℅ من الحالات ما يرجعش يلزمك closing بأسرع ما يمكن سواءا بالعروض الحصرية او بالتخفيضات.

ثالثا : ما تحاولش "تغم" الكليون بالحديث و تحب تبيعلو حاجة ما يحتاجلهاش و الا حاجة فيها Défaut ! المصداقية قبل كل شيئ. و يلزمك زادا تعرف الي الناس ولات تلوج برشا في الأنترنات و تقارن العروض و المميزات قبل ما تاخو اي قرار.

رابعا : ما تجاوبش مباشرة على أسئلة الكليون، و جاوب على سؤال بسؤال. مثلا : وقت الي يقولك عندكم مراول حمر، و في عوض تقول لا، قولو " عندكش لون ٱخر يعجبك بخلاف اللون الأحمر؟ " ديما réponse par des questions تخليك تاخو فكرة على طلبات الكليون و تنجم ساعتها توجهو لأفضل عرض.

خامسا : ما تقصش على الكليون كيف يحكي : حاول تسمع تعمل analyse و تجاوب.

سادسا : معادش تحكي بلغة خشبية : معناها كانك technicien معادش تحكي بمصطلحات تقنية راهو الكليون ما يفهمكش، و ماهوش مطالب انك يفهمك.

سابعا : يلزمك تعرف علاش الكليون متعك جاي يشري، يلزمك تسألو ، نعطيك قصة صارت معايا : مرا استحقيت ل Disque SSD ، و مانيش فاهم شنيا ال capacité الي باش نحتاجها، البياعة الي درت عليهم فيهم شكون يحب يبيعلي 1 Térabytes بسوم لا علاقة و فيهم شكون يحب يفرض رايو وحاسب روحو فاهم كل شيئ و الكليون ما عليه كان يدفع و يسكت و فيهم شكون الي ماهوش proactive معناها يخسر عليك كان كلمتين و يسكت ، في الأخير لقيت شكون سألني سؤال خلاني نتعامل معاه : هل أنك تستحق أنك تصب أفلام و عندك برشا برامج , كان لا 250 Go يفي بالغرض و زيادة و زيد سومو رخيص - هذا مثال ل vendeur فاهم خدمتو.

ثامنا : ما تحكيش كل شيئ : كان المنتج متعك يتطلب برشا تفسير حاول تختزل الميزات الكل في 3 و الا 4 نقاط رئيسية، و ديما خلي bonus يتفاجئ بيه الكليون من بعد، ال avantages cachés الي تكون في شكل هدايا و الا خدمات مجانية هي الي تخلق الفرق و تعمل ما يسمى ب enthousiasme.

تاسعا : معادش تخلي ال catalogue في يد الكليون ! معناها في المحادثة ما عمرك ما تشتت الإنتباه، الكاتالوغ خليه ٱخر حاجة و كان شد صحيح قولو خليني نفسرلك حاجات مهمة في العرض متعنا و من بعد نخليلك الكاتالوغ.

عاشرا : ما تعاندش الكليون الخبير Client expert ، ديما حط روحك في وضع الشخص الي يحب يتعلم و ٱراءهم تنجم تفيدك. نعرف الي يلزم أكثر من 10 نصائح، لكن كان عندك نصائح و الا افكار تحب تزيدهم خلينا كوننتار. على قريب تلقو podcast للمقال هذا في soundcloud.